ХОТИРА: Фанда ва кўнгилларда ёрқин из қолдирган олим Муҳаммаджон Қорабоев
Ўзбекистон бош вазири ўринбосари даражасигача кўтарилган олим жуда камтар ва оқкўнгил инсон эди.
Ўзбекистон физика фанининг жонкуярларидан бири, физика-математика фанлари доктори, профессор Қорабоев Муҳаммаджон Қорабоевич оғир касалликдан сўнг 2024 йил 23 феврал куни 82 ёшида оламдан ўтди.
Муҳаммаджон Қорабоев 1942-йил 8-мартда Андижон вилояти Андижон туманининг Харабек қишлоғида зиёли оилада туғилган. Унинг ота-онаси Қирғизстоннинг Жалолобод вилоятидаги Сузоқ қишлоғида яшашган , ўтган асрнинг 30-йилларида Харабекка кўчиб келишган. Оталари Абдужамин ота кўп йиллар давомида Харабекдаги колхозда раис бўлиб ишлаган. 1960-йилларнинг бошларида Қорабоевлар оиласи яна Сузоққа кўчиб ўтган.
Муҳаммаджон Қорабоев 1959-йили ўрта мактабни битириб, Андижон Давлат педагогика институтининг (АДПИ) физика-математика факультетига ўқишга киради. Уни 1963-йили имтиёзли диплом билан тамомлаб, шу институтнинг физика кафедрасида ўқитувчи сифати меҳнат фаолиятини бошлайди.
Кейин, 1965-1970-йиллар давомида Москва вилоят педагогика институти (МОПИ)нинг профессори В.Ф.Ноздрев раҳбарлигида илмий тадқиқот ишларини олиб боради ва 1971-йили физика-математика фанлари номзоди илмий даражасига сазовор бўлади. Шу йили Андижонга қайтиб, яна АДПИнинг физика кафедрасида катта ўқитувчи, доцент лаозимларида ишлай бошлайди.
Шу йилларда АДПИ қошида, собиқ Билдин кўчасидаги тарихий бинолардан бирида акустика лабораториясини ташкил қилади. Бу Андижонда собиқ СССР Фанлар академияси физика институти (ФИАН)нинг шу соҳадаги лабораториясини ташкил қилишга асосий база бўлиб хизмат қилади.
Кейинги пайтларда Муҳаммаджон Қорабоев АДПИ доценти, профессори, Фарғона давлат университетининг ректори, ЎзФА Иссиқлик физикаси институти директори, Ўзбекистон Республикаси Олий таълим вазирининг биринчи ўринбосари, Ўзбекистон Республикаси бош вазирининг ўринбосари каби юқори лавозимларда ишлади.
Ўзбекистонда физика фанининг ривожланишига салмоқли хисса қўшган олим, фан ва давлат арбоби бўлиш билан бирга камтарин, самимий, изланувчан ва тадбиркор инсон, меҳрибон устоз эди. У қирғизистонлик ўзбеклар орасидан етук кадрлар тайёрлаш ишларига ҳам бош-қош бўлган эди. Айниқса, Жалолободдаги Халқлар дўстлиги университетининг ўқув-тарбия ишларини уюштиришга яқиндан ёрдам бериб турар, зарур маслаҳатларини аямас эди.
Нафақат Ўзбекистон, балки Марказий Осиёда миқёсидаги илм-фан тараққиётида, бу ерда яшаётган халқлар тарихида ўчмас из қолдирган Муҳаммаджон Қорабоевнинг ёрқин хотираси дўстлари, юзлаган ҳамкасблари ва шогирдлари қалбида абадий сақланиб қолади.
Бир гуруҳ дўстлари ва шогирдлари.
